O NOSO PROGRAMA

Queridos amigos e compañeiros,

O pasado día 17 de decembro presentamos a nosa candidatura para a Xunta directiva da Delegación Galega da SEEC. O motivo desta carta é ofrecervos as consideracións que nos impulsaron a iso e os obxectivos que queremos desenvolver con todos vós.

A SEEC é a nosa asociación profesional. A súa unidade e bo funcionamento debe darnos forza e ferramentas para posuír a información máis completa e útil nos diferentes aspectos relacionados cos Estudos Clásicos e, de modo particular, a axudarnos a realizar a mellor docencia posible das linguas e cultura clásicas.

No novo marco lexislativo da Educación Secundaria, Bacharelato e Ensino Universitario no que nos atopamos, a SEEC debe promover o achegamento á actualización científica e didáctica nun momento crucial como o da implantación das Novas Tecnoloxías da Sociedade da Información (TIC) no ámbito docente.

Tamén debe proporcionarnos lugares e momentos de encontro, e órganos de expresión, para aumentar o coñecemento mutuo das nosas actividades e fomentar a información en todos os aspectos referentes ao mundo clásico.

Nestes últimos anos a Delegación Galega da SEEC deu os pasos necesarios para encarar este futuro e este compromiso. Manifestamente queremos continuar o labor feito polo anterior equipo, ao que pertenciamos 3 representantes desta candidatura. Así pois entre os nosos proxectos seguen figurando:

• a organización de cursos de Formación no marco da USC (recoñecidos pola Consellería con créditos e horas), como o de perfeccionamento de Grego Moderno II
• a organización da edición 2009 do Festival de teatro grecolatino de Lugo, para a que contamos coa presenza de Ricardo Martín, alma mater do tristemente desaparecido grupo Sardiña
• a convocatoria dunha nova edición do Concurso Odisea para 2009 (neste 2008 xa hai inscritos case 300 equipos e foi superada a participación da edición anterior), en colaboración con outras delegacións da SEEC (este ano participa a Delegación de Valencia)
• A publicación dun novo número da nosa Revista "Cuadernos de literatura griega y latina", que vai polo volume VI.

Ademais queremos afrontar os novos retos lexislativos con reunións periódicas coa Consellería, para ofrecer aos nosos socios información puntual e detallada tanto dos desenvolvementos das novas materias de Latín I e Cultura Clásica na ESO, como da implantación dos aspectos da LOE referidos ao Bacharelato en xeral e ás materias de Latín e Grego en particular.

Temos pensado tamén na organización dunhas xornadas orientadas ao emprego das TIC na didáctica das clásicas. Nelas traballaríanse temas como a creación de Aulas Virtuais para cursos de Latín, Grego e Cultura Clásica baixo a plataforma Moodle (a elixida pola Consellería e instalada en todos os centros de secundaria), a creación dun Planeta de blogs galegos orientados á Didáctica das Clásicas, ben sexan blogs de profesores ou blogs de aula, a formación dun directorio de webs de departamentos de Latín e Grego, a aplicación didáctica das Wikis, as novas ferramentas 2.0, etc.

E como obxectivo último, a formación dunha rede para que o profesorado estea en permanente contacto cos seu colegas e ben informado das diferentes iniciativas didácticas que se están desenvolvendo na nosa comunidade e no resto do Estado.

Buscaremos tamén que os diferentes CEFORE ofrezan dentro da súa oferta de cursos de formación referidos ao ámbito das linguas e cultura clásica.

Do mesmo xeito, pediremos da Consellería unha maior atención institucional á elaboración de materiais didácticos de referencia para as materias de Cultura Clásica, Latín e Grego.

Deberemos reforzar os nosos órganos de comunicación. Ademais da puntual información que os socios reciben por correo electrónico pretendemos optimizar a web http://www.seecgalicia.org/ en todas as súas seccións, convertíndoa nun verdadeiro portal de acceso á información necesaria para o desenvolvemento da nosa actividade. As bases están postas, pero queremos que medre buscando a implicación do noso colectivo a través das súas suxestións, comentarios e iniciativas, intentando resolver tamén as súas dúbidas. Buscaremos colaboradores entre os nosos socios que queiran axudar na introdución de contidos.

Confiamos en que coa axuda de todos poderemos estender o feito ata agora. Pedimos expresamente o teu voto para sentirnos apoiados á hora de acometer as tarefas derivadas dos propósitos que expuxemos. Podes efectuar o teu voto por correo se non podes asistir á asemblea do día 15.

Móstranos o teu apoio, deixa un comentario.